ភ្នំពេញ៖ នាយករដ្ឋមន្ត្រីកម្ពុជាបានលើកទឹកចិត្តដល់កីឡាករសញ្ជាតិប្រេស៊ីល Thiago Teixeira នូវថវិកាចំនួន ២០ ០០០ដុល្លារ និងគ្រោងស្នើគាល់ព្រះមហាក្សត្រផ្ដល់សញ្ជាតិដល់លោកផងដែរ។

សម្ដេចតេជោបានសរសេរនៅលើតេឡេក្រាមរបស់សម្ដេចនៅថ្ងៃទី៨ ខែមេសានេះថា៖ «ដើម្បីជាការលើកទឹកចិត្ត ខ្ញុំសូមចូលរួមជួយឧបត្ថម្ភដល់កីឡាករប្រដាល់ Thiago Teixeira សញ្ជាតិប្រេស៊ីល នូវថវិកាចំនួន ២០ ០០០ដុល្លារ។ មួយវិញទៀតប្រសិនបើមិនខុសទាស់ផ្នែកផ្លូវច្បាប់ណាមួយរបស់ប្រេស៊ីល ខ្ញុំនឹងស្នើទៅព្រះមហាក្សត្រ ដើម្បីផ្តល់សញ្ជាតិខ្មែរជូនកីឡាករ Thiago»។

ការសម្រេចរបរសម្ដេចតេជោនៅពេលនេះគឺបន្ទាប់ពីសហព័ន្ធកីឡាមួយថៃ WMO World Muay Thai Organization បានប្រកាសដកលោក Tiago ចេញបញ្ជីកីឡារបស់ខ្លួន បន្ទាប់ពីលោកបង្ហាញការគាំទ្រដល់កីឡាគុនខ្មែរ។

WMO បានចោទលោក Thiago ថាបានបង្ហាញសកម្មភាពមិនសមរម្យ និងក្រោមហេតុផលនយោបាយ។

WMO បានដកលោក Thiago ចេញពីបញ្ជីកីឡាករខ្លួនបន្ទាប់ពីលោកបានវ៉ៃឈ្នះលើសង្វៀនប្រយុទ្ធមួយថៃនៅលើទឹកដីអាល្លឺម៉ងដោយប្រើសំលៀកបំពាក់គុនខ្មែរ៕